izithandani eziyizitabane obekulindeleke ukuthi zishaye indumezulu yomshado, azisabhekani. Kuvela ukuthi ukuhlukana kwazo kudalwe wuKhuzani obewotha ubomvu ngothando lwazo, elubiza ngedimoni. USthembile “Ntando” Mkhize (obeyisithandwa sikaSphe), usolwa nangokuqola abantu esebenzisa igama likaSphe ezinkundleni zokuxhumana, ethi uzobafunela umsebenzi.
USphe usezakhele udumo emculweni kamaskandi njengoba epikwe uKhuzani engomeni ethi Ngashelwa Utsotsi nakwethi Ubhuti Wabantu. Uphinde wapikwa nayiZingane Zoma engomeni yazo ethi Iphenti Lami. Lezi zithandani zithembisene umshado nyakenye kanti bezikipitile iminyaka emibili eMlaza.
Kumanje kunecala elivulwe wuSphe emaphoyiseni mayelana nalokhu kuqolwa kwabantu. Okhulumela amaphoyisa aKwaZulu-Natal, uColonel Thembeka Mbele, ukuqinisekisile ukuthi kunecala lenkohlakalo eliphenywa ngamaphoyisa aseMpangeni. Kanti uNtando usabisa ukuputshuzela umphakathi izithombe nama-video abo bezitika ngocansi. Uthe ufuna abantu bazi ukuthi uSphe akasiyo le ntombazane abacabanga ukuthi uyiyo.
“Nami ngazi inqwaba yamahlazo akhe. Njengoba abehamba ezibiza ngentombi ehlolwayo, ubanjiwe ngoDisemba ukuthi ubekhohlisa abantu,”kusho uSphe. UNtando uthe umuntu obenesandla esikhulu ekuhlukaneni kwakhe noSphe nguKhuzani ngoba ubengabemukeli ubudlelwano babo.
“UKhuzani uzame kaningi ukuphoqa uSphe ukuba ahlukane nami. USphe ubengikhombisa imiyalezo ebivela kuKhuzani, ethi sinamadimoni, " kusho uNtando. Eqhuba uNtando uthe wenzele uSphe izinto eziningi ngoba uyintombazane ethanda impilo engaphezu kwamandla ayo.
“Nasekhaya eHammarsdale bayamazi uSphe kanti nabakubo bayangazi ngoba ngike ngaya khona KwesakwaMthethwa, eMpangeni, ” kusho uNtando. Elinye ilungu lomndeni kaSphe, elicele ukungadalulwa, livumile ukuthi liyazi ngalobu budlelwano nangesithembiso somshado. UKhuzani ungumphathi kaSphe futhi bobabili bazalwa oMaNgema.